قفشة مش مجرد صفقة.. ده روح جديدة بتدب في جسد الاتحاد
عادل احمد: موجة سبورت
اللي حصل مع قفشة في الاتحاد السكندري مش صفقة وخلاص، ولا لاعب جاى يعدي فترة ويمشي، ولا اسم كبير تهدّي بيه الإدارة غضب الجماهير… لأ، ده لاعب جاى لهدف، ورسالة، ودور أكبر بكتير من مجرد المشاركة.
من أول يوم، قفشة عمل حاجات كتير غيره معملهاش في سنين. وفي مباراة حرس الحدود الأخيرة، كان المشهد واضح قدام الكل: قائد، منظم، ومحفّز… لاعب بيقوم بدور المدرب جوه الملعب، ينظم التمركز، يشد من أزر زملائه، ويخلق روح قتالية تحسسك إن الراجل ده ابن النادي من سنين مش ضيف جديد.
الغريب والعجيب إنك تشوف لاعب لسه جاي، بس غيران على الاتحاد، فرحان لفوز الفريق كأنه واحد من جماهير الدرجة التالتة، همه الوحيد إن سيد البلد يكسب والجماهير تفرح.
وبعد الفوز؟ ولا استعراض، ولا لقطة مصطنعة، استغل قفشة الفرحة علشان يقرب بين الجماهير والكابتن تامر مصطفى، في مشهد كأنه بيقول:
الصلح خير… ونبدأ من جديد علشان الاتحاد.
اللي شوفناه ده قمة جبل أخضر ، واللي جاي أحلى بكتير.
بصراحة ومن غير مبالغة: يا قفشة… إيه اللي بتعمله ده؟! ده أنت مكسب كبيييييير قوي للاتحاد، فنيًا، ومعنويًا، وإنسانيًا.
وفي الآخر، التحية واجبة لـ الأستاذ محمد سلامة رئيس نادي الاتحاد السكندري، اللي اشتغل بهدوء، وعمل كل حاجة حلوة علشان الاتحاد يفرح… والجماهير تحس إن ناديها ماشي في الطريق الصح.